Uchu Banyan

Selamat Datai Ngagai Blog Uchu Banyan






Biau Pengelalu....




Sa, dua, tiga, empat, lima, enam, tuuuuuujuh!
Enda aku busong ngelangkah gunong,
Enda aku tulah ngelangkah tanah,
Enda aku danjan ngelangkah bulan,
Enda aku tumbang ngelangkah batang!
Laban……
Kaki aku udah bediri di segi batu anggung
Mulut aku udah ngetup lilup duku chandong
Blakang aku ditinggang seludang baju burong.
Lengan kanan aku udah ngeraran di dan tapang betenung

Pala aku di-bap pua kumbu lama di sua Pungga di surung lulung.
Laban aku tu ukai mungkal ukai nanjal,
Ukai muntang ukai nengkebang,
Aku tu endang niti endang nali,
Endang bechuan endang neladan
Baka ijuk tampung penduk,
Baka wi tampung tali.
Pecah periuk tanah ganti periuk tani,
Padam bulan diganti matahari,
Nadai orang ka tuai ganti tubuh kami,

Nya baru aku ngangkat ka kita ke lama udah rarat,
Tinggang urat sebangki api.
Tu baru aku nyungkang kita ke udah lama midang,
Tinggang batang tebelian wi.
Aku nyerungkai kita ke udah lama nadai,
Keranjai indai imbok kedidi.

Aku ukai ngangau ngapa, ukai ngangau pia,
Ngangau kita enggau ading enggau piring,
Enggau terantang enggau gendang,
Piring penganan, piring penyaran,
Piring ai piring tumpi
Piring Arak, Piring Tuak,

Minta kita nya datai ngabang,datai nguang
Datai nulung datai nyukung
Datai megai datai ngimbai
Datai ngiring datai ngembing

Nyua ka kami pengaruh gembar tubuh
Ubat serangkap genap,
Mai taring uting babi ngelampai
Tanduk rusa ke bepanga ujung mulai
Tanduk pelanduk jadi ke penunduk
pengaruh besai,
Ubat pemenga kena mansa baya meradai,
Ubat kaya,ubat raja,
Ubat bidik , ubat lansik
Ubat mai tuah mai limpah,
Mai pengerai mai penyamai
Mai pemansang mai penyenang

Ngambika ila kami bekebung baka langit,
Betuchung baka bukit,
Bepunchak baka jala,
Betuchung baka lingga

Enti bedagang kami ila menang bebeli
Enti bumai kami ila enda berasai ngisi bingkai
Tibang padi,
Enti sekula bulih diploma maioh degri
Enti kereja jelai nama tampak pegari.

Segang kitai ila baka pasang ai raya,
Terang kitai ila panchar rambang bulan pernama,
Chelap lindap,gayu guru ,gerai nyamai baruh bingkai
bulan mandang.

OOOOOOOOO..haaaaa….

Share

Sukut Gambar

Gambar Gawai 2009




Lebuh maia ti ngulu pengawa Gawai Lelabi kena 2-June-2009 di Rh Jampong, Ng Jerangku
Ai Machan, Kanowit. Akai dai, iya ga ai langkang amat maianya. Nyau pedis punggung bebatak ke perau. Nyau ninting rantau tepanggai aja-aja, tambah mega ni ke besual.
Sigi gaia iya meh kitai ga nangkup indu dara ulu sungai. Ka pan enda endang udah adat meh gawai lelabi dirumah indu. Nganti pengawa ke bealu-alu pengabang sempat ga ngambi gambar dikerangan.




Nyau bekebesut kamera bala kaban beganti begambar-gambar. Bisi sekeda bala anembiak ngambi peluang mandi ai sungai ti chiru serta umbas iya penyelap.Bisi ga pengelengau dalam ati lebuh ngingat ke cerita agi mit kelia sigi utai enda pulai ari ai.Enda agi diau dirumah, nyau mandi besari-sari.

Bala aya serta kaban duduk nganti ke deka mandi sebedau enggau ngulu bala ke bealu-alu enggau tuai kayau.Mandang ka transport ke dikena ari pasar Machan ti dibai driva khas menua Machan empu. Baka tudah diri ukai enda nemu mai motor ai tang meh lama udah enda masang serta enda tentu nemu tuju jalai laban sungai nyau jauh amat berubah ari kelia.

Miring & Gawa Ditanju

Pengawa Gawai Kitai Iban


Hooo..ha.... ko iya.. nya meh munyi pun leka sampi kitai sebedau bejadi pengawa tauka maia datai jam ngepun ka pengawa bedara,miring,sandau ari,kelingkang tuah serta maioh agi bansa gawai kitai iban.
Belabuh ari rintai piring nyentuk ka babi mati maioh amat tikas utai ti patut diperajar ke kitai kerebak dudi. Maioh kitai mina nemu nyebut ka bedara ka miring serta ka begawai, tang meh lalu enda ga nemu ripih pengawa. Nya alai nadai salah kitai kebiak-biak ke agi ngembuan serta nguna pengawa tu berajar ke ripih tauka cara pengawa tu ngambi ke enda puntan.
Enti betul-betul ripih tauka atur, ba penemu serta asai ba aku pengawa tu cukup ngasi.
Nadai beda iya suba enggau diatu,munya enggau ila... laban dimenua peda aku agi bisi ga bala ti agi ngereja pengawa tu tang meh selalu amat dipeda aku maia ngeripih tauka ngerintai ka piring nyau kalat-kalat begiga ke orang tuai.
Nya alai ti maia kitai tauka orang ti semak kitai bisi pengawa begawai tauka miring tau meh kitai berati ngambi ke nemu ngereja dudi ari.
Senentang bepeda ke ati babi pan aku alit ati meda orang ke tuai, tau nemu macha nemu meda ati babi manah tauka enda tentu nyengala. Iya ke udah amat ngasi ga aku ngasai ba tubuh diri.
Nya kebuah ti orang sandau ari enti nyema ati babi bisi enda ngemuas ke ati sida suah amat sandau ari kedua kali sampai ati babi ngemuas ke ati.

Pia mega gawa di tanju, baka kelingkah tuah. Maioh amat rintai pengawa tu. Berancau berapa ari, udahnya nuduk berapa ari. Serta nguna lemambang enggau bala ke nuduk ke gawai kelingkang tuah.Diatas nya gaya sida ke gawai ditanju maia kelingkang tuah sebedau babi mati serta sebedau nama ke tuah kebilik.Bisi ga nya bala ti begendang endang main wajib maia gawa kelingkang tuah tauka sandau ari.

Gambar diatas nya bala indu dara benung nyait ubung merah enggau macam agi chura ngagai baju bala bujang ti beempu pengawa.

Tu gaya ati babi sida tu dirintai ka di tikai udah nya di bacha sida ketuai serta bala ti nemu nela meda ati babi. Udahnya baru sida nusi bakani gaya ati babi sida tu.

Tu iya maia bealu-alu nama ke tuah kebilik pengudah babi mati. Udahnya baru sida munuh babi dibilik. Ti dikumbai babi tuah, mina tau diempa dibiliknya enda tau dibai kebilih bukai endang udah pantang ari kelia munya.
Baka nya meh gaya lebuh maia kitai nuduk ka gawai kelingkang tuah. Ila aku nusi baru nganti udah bulih sumber ti nyentuk agi.

Ari Gawai

Gawai Di negeri tauka di Menua Diri Ni Nyamai?
Ba penemu aku cukup nyamai meh gawai dimenua diri,gawai dirumah panjai
banding ka enggau dinegeri. Pengudah aku ngasai suba nyau empat taun gawai merantau
dinegeri dimenua orang. Nyau sengit-sengit ati ngenang diri sebilik,apai indai
serta kaban belayan. Laban maia tu meh maia betemu maia begulai enggau kaban
belayan ti jauh.Ukai ketegal ka ngirup ukai ketegal ka poco-poco munyi ko orang diatu tang meh laban ka begulai ka betemu enggau kaban serta pangan lama.





Tu meh maia betunga serta betanya ke jalai pengidup, bekenang ke pengawa begulai enggau diri sebilik. Nyau maia maia ngelansa pengingat lama, berasai ga penyinu diati lebuh ngenang pengidup diri kelia tang besampi terima kasih ke petara laban jauh amat beda pengidup suba enggau diatu berasai jauh amat lantang...

Kadang-kadang nya bisi ga gaya ti ngasuh ka ketawa bala kaban, bala petunggal serta bala aya. Maioh aksi maioh lakon ti ngasuh enda kering gusi.Bisi nya ari gaya becerita, bisi nya ari gaya nganta kediri.

Rami Gawai Lelabi @ Melah Pinang

Kena 2nd-June-2009 tu kemari,Uchu Banyan enggau Gina U nuduk ka gawai lelabi @ melah pinang di rumah Jampong, Ng Jerangku Machan Kanowit.

Uchu Banyan@SMD & Gina U






Bala aya serta petunggal ke begelumu nganti pengawa ke nyadi.


Nya iya bulih!! Bala aya serta ipar enggau bala kaban benung ngansar ke kaki.Macam-macam stail..landik amat..nyau macam-macam gelek munyi..ko laut..


Nya iya bulih gi...benung betapat ngirup beer ngena mangkuk,perisi dua tin sekali gus...sapa alah batak ngajat...


Nya iya...ayun lundai kaki seduai tu..... (Indai Aleksander & Indai Tuty)


Nama gaga seduai dua tu kini..besampi sebedau ngirup beer..ha..ha..nya iya bulih..gasak ika..

Lagu -Lagu Uchu Banyan

Cerita Pengingat Nyelam Di Ulu Latong

Semalam Di Ulu Latong

Pejalai kami sebuat kira ke tiga puluh minit ari kem balak nanga Machan ngena motosikal .Nengah jalai kem besai serta udahnya nama jalai lipan lama. Ukai main penusah laban jalai nyau belubang terusur ai ujan tambah mega lama enda ditengah.

Nyau puas tersungkur puas melipat ngena motosikal baru datai ba endur ke dituju. Tang laban bai ati rindu kami sebuat enda peduli, bakani pengelicin jalai pan di terus ke aja meh pejalai.
Maioh ikan jual dikedai tang enda meh asai ikan ai sungai, ikan menua ulu baka ikan semah, ikan palau, banta, buing, tengadak enggau maioh macam agi.


Gambar Kami sebuat baru datai di ujung jalai lipan, kira ke lima belas minit bejalai kaki nuju sungai Latong.


Benung kisuk bebantai ke perengka ke dikena belaban ke ikan ai latong.
Siti agi, menua tu ngipak ke nama iya "latong" enda entu tau maioh mulut.
Taja pan jako ribai... nemu meh jelu antu menua tu..ha..ha...


Ha tu iya.. ikan pupu bangsa....ulih ba siti lubuk aja... Tekenyit ga anak ati.. agi bisi endar ga
ikan menua tu..tang meh nadai entu besai.. mina ke mesai buah betis meh ke pengambis besai.


Baru tembu nyelam, belelak enda lama. Celap amat ga maia tu kira urong pukul dua pagi.


Kami dua aya aku Acup @ Shamsudin benung betunu ke ikan kena ngisi gelung.
Laban ngira diri pulai ari diak deh kami sebuat enda bebai ke bekal. Mina tak ngulam ikan aja.
Jera...nya..lama udah enda... hantam sajalah.. munyi ko P. Ramli.


Mansut ke ikan ti deka di tunu..... sebedau kami belabuh nyelam baru..


Benung kisuk bebantai ke ikan.. milih bansa ikan serta meruti ke duak...


Ha..nya iya... tu ikan ulih kami sebuat baru... bisi tengadak, banta enggau ikan palau...


Nya iya... tu ikan semah @ anak tengih ko kami menua Machan...

Lelak endang sigi amat lelak kerja tu..tang meh cukup pengerindu. Lebih agi enti bebala-bala nurun ke kampung...Ti enda laban jalai balak, sampai diatu agi meh maioh ikan menua kami "Ulu Latong" . Enda ibuh bejalai ke jauh... tang meh nyau pandak jako... Udah terlabuh bai sida ke tuai dulu kelia... Diatu mina nyapu-nyapu sebelah ungkap..sebelah lubuk nganti sungai ke enda keruh...